Patay ang 26 anyos nga lalaki matapos nga gintiro sang wala makilal-an nga suspetsado sa Hda Paje, Brgy Consing, EB Magalona, Negros Occidental kahapon sang hapon, Agosto 19.
Ginkilala ang biktima nga si Jan Edrian De Leon, lalaki, kasado, kag residente sang Grandville 3 Subd., Brgy Mansilingan, Bacolod City.
Sa interview sang Bombo Radyo Bacolod kay Police Captain Markelly Laganipa, Deputy Chief of Police sang EB Magalona Municipal Police Station, indi pa nila mahambal nga pagpangawat ang motibo sa krimen bangud wala pa makumpirmar nga may nakuha sa gamit sang biktima.
Suno kay Laganipa, ang biktima ang nagasakay sa motorsiklo kag sang nakaabot sa lugar, ginlambatan ini kag gintiro sang wala makilal-an nga suspetsado.
Suno diri, ginhingagaw pa dala sa ospital si De Leon apang wala na ini matabangan pa.
Ang inisyal nga nakita sang mga kapulisan nga pilas sang biktima ang yara sa ulo sini.
Sa karun nagapadayon pa ang imbestigasyon sang EB Magalona Municipal Police Station agud nga matumod ang suspek kag motibo sa krimen.
