Desidido ang mga ginikanan sang napatay nga si Joman Fuentes, 21 anyos nga magpasaka sang kaso batok kay Police Corporal Armin Alanza, 36 anyos nga nagluthang sa ila nga mag-amay sa Barangay Canjusa, Pulupandan, Negros Occidental.
Sa interview sang Bombo Radyo Bacolod kay Jomarie Fuentes, 52 anyos, pag-abot sini amo man pagluthang sang pulis sa iya nga bata.
Bangod madamo sang barkada ang iya bata nga kasumpong sang pulis, agud wala na sang iban nga matiruhan nagtinguha ini nga madisarm ang pulis.
Siya ang nakaangkon sang pilas sa kilid.
Suno diri, madamo sang ginasita ang pulis samtang naga-inom sa tyangge kag kalakip na diri ang barkada sang iya nga bata.
Panindugan sang amay nga wala sang problema sa batasan sang iya bata
Samtang emosyonal naman nga gintindugan sang iloy nga si Monday Nora Fuentes nga kasuhan gid nila ang pulis bangod indi na sini mabalik ang kabuhi sang ila bata.
Suno diri, si Joman ang ikatatlo sa anom ka mag-utod, may pamilya na ang iban gani ini na lamang kag ang manug-graduate sa Grade 10 nga manghod nga babayi ang nabilin sa ila luyo.
Pahayag sang iloy nga handom pa ni Joman nga mapatapos sa kolehiyo ang iya nga manghod, apang ini ang indi na niya matuman matapos mapatay sang pulis.
Panindugan sang iloy nga tuman ka buot sang ila nga bata, kag apisar nga naga-inom ini ang nagapauli lamang gilayon kag nagatulog.
Bisan akigan sang amay, ini sa masami ang nagapahimuyong lamang.
Suno sa iloy, kahapon nagakatulog na ang ila bata sang ini ang ginpukaw sang iya mga abyan.
