Nagalaom ang Fire Marshal sang Bacolod City Fire Station nga mabatun na nila subong nga tuig ang ginrequest kay Bacolod City Mayor Alfredo “Albee” Benitez nga 100 nga dugang nga fire hoses.
Sa interview sang Bombo Radyo Bacolod kay Fire Superintendent Jenny Mae Masip, kun ipaanggid ang datos sang 2023 kag 2024, mas madamo ang natabo nga sunog sang tinalikdan nga tuig.
Apang ginapakamaayo lamang nila nga kalabanan sa mga ini ang may isa ukon duha ka mga structural damages lamang ukon nagakasunog nga mga balay kag kun kis-a ini ang fireout na sa ila nga pag-abot.
Nagapati si Masip nga ini ang resulta na sang madasig nga report gikan sa mga pumuluyo, gani madasig man nga nagakarespondihan sang mga bombero.
Apang aminado ini nga apisar sa madamo nga request sang Bacolod City Fire Station, madugay gid man mag-abot ang mga equipments nga ginapangayo bangod sa procurement process.
Ginalauman sini nga mabatun na nila ang isa ka gatos nga fire hoses nga ila ginrequest may Mayor Albee.
Paathag ni Masip nga ini ang importante bangod sa mga suludlon ukon maligwin nga mga lugar nga masami luntaran sang sunog ukon sa mga nadeklarar nga red zones, nagadangat sa 15 ka mga hoses ang ila nga ginagamit.
Suno diri, dyutay lamang ang fire hoses sa Bacolod City kag wala man sang procurement gikan sa Bureau of Fire Protection Central Office.
