Nasapwan nga wala na sang kabuhi ang 38 anyos nga lalaki nga nahulog sa kalog sa Hermilinda 1st roadblock 5 lot 9, Brgy. Mansilingan, Bacolod City.
Ang biktima ang ginkilala nga si Jayson Tolentino, 38 anyos kag residente sa nasambit nga lugar.
Sa interview sang Bombo Radyo sa utod sang biktima, nagpadulong kahapon ang iya manghod sa abyan sini kag sang papauli na amo nga nagluntad ang insidente.
Suno diri, nasapwan na lang kaina sang aga si Tolentino nga yara sa kalog samtang nagasakay sa gihapon sang bike apang ang ulo sini ang nabunggo sa bato nga haligi sang kalog.
Nagapati naman ini nga posible yara sa impluwensya sang makahulobog nga ilimnon ang iya manghod bangod madugay naman ini nga nagabike kag didto man masami nagalabay sa lugar.
Wala naman sang may nakita nga foul play ang kapulisan sa pagkapatay sang biktima nga si Jayson Tolentino.
Sa interview sang Bombo Radyo Bacolod kay Police Captain Dax Santillan, station commander sang Police Station 7, wala sang suga sa area kag wala man sang baral nga nabutang amo nga indi makit-an nga may kalog sa dalan.
Suno diri, wala sang foul play nga nakit-an kag ginapatihan nga injury sa ulo sini ang rason sang kamatayon sang biktima.
