Gin-aresto si former La Castellana Municipal employee Elvin Dela Fuente may kaangtanan sa 14 ka kaso sang paglapas sa Cybercrime Prevention Act of 2012 kahapon, Agosto 3 sa Diamond St., Jade Compound, Brgy. Talon Uno, Las Piñas City, Metro Manila.
Ang kaso ang ginfile ni La Castellana Vice Mayor Rhummyla Mangilimutan sa Regional Trial Court Branch 45 sa Bacolod City.
May ginrekomendar nga piyansa nga P10,000 sa kada kaso.
Si Dela Fuente ang ginakabig nga Most Wanted Person nga residente sang La Castellana apang naga-istar na sa Las Piñas City.
Madumudman nga gindismiss sang Office of the Ombudsman ang administrative kag criminal cases nga ginpasaka ni Dela Fuente batok kay Manglimutan sang 2024.
Gin-akusaran sadto ni Dela Fuente si Manglimutan nga nagagamit sang government funds agud ipasweldo sa gina-alegar ghost employees.
Apang ginpahayag sang Bise Alkalde nga ang akusasyon batok sa iya ang “politically motivated” lamang.
Sa interview sang Bombo Radyo kay Mangilimutan, ginpaathag sini nga indi niya luyag nga mahuy-an si Dela Fuente sa baylo gusto niya mahibaluan ang tawo nga nagasuporta sini kag ang mga nagasulsol.
Suno kay Manglimutan, normal lamang sa pulitika nga mangkritiko sa liderato apang ang personal nga pangbastos kag mga pangyaguta ang indi manami.
Suno diri, dapat ang mga ginapanghambal ni Dela Fuente ilabi na sa social media ang iya mapamatud-an kag tindugan sa Korte.
Kilala sini ang personal nga kapasidad ni Dela Fuente kasubong man ang upod nila sa opisina bangud sila ang nag-updnay sa malawig nga tion kag nangin maayuhay sadto apang nakibot na lamang si Manglimutan kun ngaa tuman ini ka powerful manghambal.
Pahayag sang Bise Alkalde nga indi lamang ang kaugalingon ni Dela Fuente ang iya ginapakahuy-an kundi kasubong man ang mga pumuluyo sang La Castellana.
