Tatlo ka local government units sa Negros Occidental ang nagsuspender sang face-to-face classes subong nga adlaw bangod sa forecasted maximum heat index nga 40 degrees Celsius.
Ini ang ginlakipan sang ciudad sang Kabankalan kag Himamaylan kasubong man ang banwa sang EB Magalona.
Sanday Kabankalan City Mayor Benjie Miranda kag Himamaylan City Mayor Raymund Tongson ang lunsay nagpagwa sang Executve Orders tuhoy sa kanselasyon sang face to face classes kahapon pa lamang matapos magpagwa sang forecast ang National weather bureau.
Ang suspension of classes kag school works ang ginpatuman sa tanan nga lebel, pampubliko man ukon pribado bangod sa mataas nga heat index nga naclassify sa “extreme caution” category.
Sa pihak nga bahin ang banwa sang EB Magalona ang may-ara naman sang ginpagwa nga localized guide for suspension of classes depende sa lebel sang heat index.
Sa 32 tubtob 39 degrees Celsius, mapabilin ang face-to-face classes.
Sa 40 tubtob 41 degrees Celsius, ipatuman ang blended learning nga lakipan sang face-to-face classes halin alas-7:00 tubtob alas-10:30 sang aga kag modular classes halin ala-1:30 tubtob alas-4:30 sang hapon.
Samtang sa 42 tubtob 51 degrees Celsius, suspendido ang tanan nga face-to-face classes kag magashift sa modular classes.
Sa interview sang Bombo Radyo Bacolod kay Negros Occidental Provincial Disaster Risk Reduction and Management Office Head Irene Bel Ploteña, sang aga, nagdangat pa sa 26 degrees Celsius ang heat index sang kaagahon apang amat-amat nga nagsaka.
Suno diri, ginakonsiderar sang mga ini ang tuman nga init.
Nagapati si Ploteña nga maga-adjust man ang mga mangunguma kag temprano pa nga nagatrabaho samtang nagapahuway kun mag-init kag nagabalik na lamang sa paghandong sa hapon.
Ang sitwasyon ang indi naman parehas sang nakaligad nga tuig nga may deklarasyon sang El Niño Phenomenon.
Sa baylo La Niña phenominon ang deklarasyon sa karun, gani nagalaom ini nga indi tuman ang impact sang mataas nga Heat Index.
