Panugyan sang gobernador sang Negros Occidental nga magbalon gid sang tubig partikular na kun nagatinir sa gwa karun nga tuman ka init sang tiyempo.
Ini kasunod sang forecasted maximum heat index nga 40 degrees Celsius sa Negros Occidental.
Sa interview sang Bombo Radyo Bacolod kay Governor Eugenio Jose “Bong” Lacson, na-eksperyensyahan naman sang probinsya ang kaangay ukon mas mainit pa nga panahon nakaligad nga tuig.
Ang basic advice gid lamang sini amo ang magpabilin nga hydrated ukon masami nga mag-inom sang tubig.
Suno diri, dapat seguruhon nga may balon nga tubig kun nagatrabaho sa gwa kaangay sang mga traffic enforcers.
Panugyan sini nga kun mahimo i-adjust na lamang ang oras sang pagbulad sa initan, ilabi na nga tuman ka init nga temperatura halin alas-10:00 sang aga tubtob alas-3:00 sang hapon.
Sa mga eskwelahan, ginahatag naman sini ang desisyon sa tagsa ka local government unit (LGU).
Apang antes magpagwa sang deklarasyon, panugyan sini nga magkoordinar anay sa Department of Education (DepEd) bangod ang mga ini ang may ginalagas nga required number of school days.
Suno diri, mas mainit ang nabatyagan nakaligad nga tuig gani dapat nakahibalo na sa risgo kun magpatumbaya.
