Ginalantaw sang political analyst nga sunod nga dagdagan sang warrant of arrest sang International Criminal Court sanday Senator Ronald “Bato” Dela Rosa kag retired police chief Oscar Albayalde may kaangtanan sa drug war killings.
Sa interview sang Bombo Radyo Bacolod kay Atty Jomax Ortiz, sa ginbasa sa pre-trial presentation sa The Hague, Netherlands, duha lamang ang grounds sa “crime against humanity” allegation nga ginlakipan sang 18 counts sang siya ang alkalde pa lamang sa Davao City ukon ang gina-alegar Davao Death Squad kag 19 counts sa mga Extrajudicial Killings sa implementasyon sang War on Drugs sang Duterte Administration.
Ang mga kaso sang alkalde pa lamang si former President Rodrigo Duterte ang ginfile nanday Arturo Lascañas kag Edgar Matobato; samtang ang EJK allegations ang ginfile naman ni former Senator Antonio Trillanes IV.
Ginalantaw ni Ortiz nga hungod nga ginschedule ang masunod nga hearing sa Setyembre 23 bangod nakahibalo na ang chamber nga pagadagdagan man sang warrant of arrest sanday Senator Ronald “Bato” Dela Rosa kag retired police chief Oscar Albayalde.
Kun ang mga ini ang madagdagan sang warrant of arrest kag madala sa The Hague, ginalantaw ni Ortiz ang posibilidad nga ulupod na lamang ang mga ini sa pag-atubang sa trial proper.
Pahanumdom naman sini nga ang averange nga dalagan sang proceedings sa ICC ang yara sa walo ka tuig, kun sa diin si Duterte ang mangin 88 anyos na.
Bangod sini, isa sa kwestyon amo ang kahimtangan sang ikaayong lawas sang anay Presidente bangod sa stress, ilabi na nga ini ang isolated kag mabudlayan sa pagcontact bisan sa iya pamilya.
Pahanumdom sini nga karun nga pre-trial hearing pa lamang, nakita na nga nagapalangluya si Duterte.
