Ginalauman nga ma-implementar na ang paggamit sang body cameras sang mga traffic enforcers sa Bacolod City sa bulan sang Abril.
Sa interview sang Bombo Radyo Bacolod kay Jose Antonio “Jojo” Robello, deputy head sang Bacolod Traffic Authority Office, sa karun ginatest na sang mga strikers ang body cameras.
Suno diri, sila ang nagbakal sang 150 tubtob 200 nga mga body cameras nga ipasuksok sa mga traffic enforcers.
Ang body camera ang may audio kag video recording apang pahanumdom ni Robello nga i-on lamang ang video kun may-ara sang padulongan nga traffic violation.
Ini bangod sa masami, kun may-ara sang indi paghangpanay sa tunga sang gina-apprehend kag naga-apprehend, may-ara man sang kanya kanya nga version sang estorya, gani mabudlay para sa ila nga magtumod kun sin-o ang matuod nga may sala.
Apang sa presensya sang body cameras, matumod ang context sang reklamo kag makita ng paagi kag rasun sang pagdakop.
Ini ang magaserbe man nga depensa sa mga traffic enforcers nga nagahimo sang ila responsibilidad kag transparancy man para sa mga pumuluyo kun may-ara sang anomalya sa pagsita ukon pagticket.
May iga-assign nga body cameras sa kada traffic enforcer apang ini ang indi man mahimo nga paandaron sa pagsugod pa lamang sang shift bangod mahimo maubos na ang battery antes paman matapos sa duty.
Sa pihak nga bahin, kada duha ka adlaw, ang memory card sang body cameras ang isurrender sa BTAO office kag ini ang icompile sa isa ka hard drive.
Paathag ni Robello, nga indi para sa publiko ang mga footages, kag ini ang for internal consumption lamang, magluwas kun magrequest sang formal investigation sa Bacolod City Mayor’s Office.
Suno diri, dapat nga mabalik gid kada duha ukon tatlo ka adlaw ang body camera bangod may recycling period ini kag mahimo matapakan ang bag-o nga mga videos.
