Nagdangat sa 20 ka mga pupils sa Bubog Elementray School sa Brgy Bubog, Talisay City, Negros Occidental ang nabiktima sang food poisoning.
Sa inisyal nga impomasyon, 15 ka mga estudyante ang gindala sa City Health Office kaina sang aga, apang ini ang nadugangan pa tubtob nagdangat sa 20.
Nahibaluan nga ang tiyo sang isa ka pupil ang nagatrabaho sa Brgy Handumanan, Bacolod City sa pagpakaon sa mga ulod gamit ang mga expired nga pagkaon.
Nagadala ang tiyo sang expired nga pagkaon papauli nga kun kaisa ila man ginakaon apang wala man sang epekto sa ila nga may edad na.
Naghambal man ang tiyo nga ginatago sini ang mga pagkaon agud indi malab-ot sang mga kabataan apang wala nila natulupangdan nga ginkuha sang bata ang pagkaon kag ini ang iya ginbaligya sa eskwelahan.
Sa interview sang Bombo Radyo Bacolod kay Ian Arnold Arnaez, public information officer sang Department of Education division of Negros Occidental, nag-eksperyensya sang pagsululuka kag pagsakit sang tiyan ang mga nakakaon sang tsokolate kun sa diin gilayon nga ginpatawag ang ambulance para madala sa City Health Office ang mga biktima.
Sa karun yara na sa estable nga kondisyon ang mga kabataan.
Nahibaluan naman nga ang tsokolate nga ginkaon nila ang expired na sang Setyembre 2024 samtang ang potato chips naman ang expired na sang Oktubre 2024.
