Ginhingadlan bilang acting Regional Director sang Police Regional Office – Negros Island Region si Police Brig. Gen. Jack Wanky.
Ini sa ginpatigayon nga ceremonial activation sang Police Regional Office – Negros Island Region alas-2:00 subong nga hapon.
Ang aktibidad ang ginpatigayon sa convention hall sang Acacia Hotel sa reclamation area.
Sa interview sang Bombo Radyo Bacolod kay Negros Occidental Police Provincial Office Spokesperson Police Captain Judesses Catalogo, ginpreparar sang maayo ang security plans kag road security para sa mga nag-abot nga matag-as nga opisyal sang Philippine National Police (PNP) kag iban pa nga ahensya sang gobyerno.
Nagpreparar man sang personnel nga naghatag sang arrival honor sa mga National Officials nga ginlakipan nanday Police Major Elmer Bonilla, station commander sang Bacolod Police Station 4; Police Captain Francis Depasucat, station commander sang Bacolod Police Station 1 kag Police Lt. Col. Joery Puerto, ang head sang Operation and Management Unit sang Bacolod City Police Office.
Samtang ang Talisay kag Silay City Police Station naman ang naghatag sang road security sa convoy sang mga bisita halin sa Bacolod-Silay Airport kag ginsalo sang BCPO kag Bacolod Traffic Authority Office pagdangat sa ciudad sang Bacolod.
Nahibaluan nga sa NOCPPO headquarters kuntani patigayunon ang ceremonial activation, apang bangod sa limitado nga space, nadisisyunan nga didto na lamang sa Acacia Hotel.
Paathag ni Catalogo nga ini ang seremonya na lamang agud mangin opisyal, bangod una na nga naturn over ang mga resources sa PRO-NIR.
Ang temporary office sang PRO-NIR ang yara sa sulod sang NOCPPO Headquarters.
Apisar sa pagdeklarar kay Wanky bilang PRO-NIR Acting Director, siya ang nagapabilin gihapon nga Regional Director sang Police Regional Office 6.
