Ginahibalo pa sang Provincial Explosive Ordnance Disposal kun ano nga klase sang granada ang nakit-an sa dalan sa Sitio Libon, Purok 4, Barangay Tuyom, Cauayan, Negros Occidental, kagab-i.
Sa interview sang Bombo Radyo Bacolod kay Police Lt. Col. Lowell Garinganao, hepe sang Cauayan Municipal Police Station, may naglabay nga salakyan nga naglapak sa granada kag samtang nagalakat sa dalan ang magtiya ginpudyot sang hinablos nga lalaki ang granada.
Ginhambalan sang tiya ang iya hinablos nga ibalik sini kun diin niya man ginkuha ang granada.
Suno kay Garinganao, ginreport sa ila estasyon ang natabo kag ila ginrespondehan ang area.
Gintskeyar man sang 15th Infantry Battalion (15IB) Explosive Ordnance Disposal unit ang granada kag ginkumpirmar nga granada gid man ang nakit-an sa dalan.
Apang, ini ang safe naman kag gindala sa Cauayan Municipal Police Station kag ginahulat na lang ang Provincial Explosive Ordnance Disposal unit nga magakuha sini kag itsekyaron kun bala government issued ang granada ukon may yara sang nagapanag-iya kag kun ano ini nga klase sang granada.
