Ginpatawag na ang traffic enforcer sa Bacolod City nga navideohan nga may ginadaho gikan sa isa ka truck driver.
Sa interview sang Bombo Radyo Bacolod kay Bacolod Traffic and Transport Management Department officer-in-charge Patrick Leonard Lacson, bisan sanday Bacolod City Mayor Alfredo “Albee” Benitez kag Councilor Israel Salanga ang nagcontact sa iya tuhoy sa nagalapta nga video.
Gilayon man sini nga ginpatumod kun sin-o ang nasambitan nga traffic enforcer kag kun sa diin naka-assign.
Pahayag ni Lacson nga ang insidente ang natabo sa bahin sang downtown area.
Ini ang wala naman ginpaduty subong nga adlaw, sa baylo ginpakadto sa ila opisina sa Barangay Alijis kag ini ang ginpaidalom sa restrictive duty.
Paathag ni Lacson, nga may ginsaway na ini sadto nga traffic enforcer matapos makita nga gindahuan kag nagbatun man sang sigarilyo.
Suno diri, kun bisan sigarilyo ang wala ginapahanugutan nga batunon sang mga traffic enforcers gikan sa mga motorista sa tion sang ila serbisyo, mas ginadumilian pagid kun ini ang kwarta kag iban pa nga pwede masuhol.
Dugang pa ni Lacson nga ginhimo sang traffic enforcer ang violation mismo sa truck ban waiting area.
Suno diri, imbestigaran nila ang nasambitan nga insidente.
Apang sa inisyal nga impormasyon, indi manami ang evaluation sa nasambitan nga traffic enforcer gani wala na nalakip ang pangalan sini sa promotion para sa plantella.
May nabatun man ini nga impormasyon nga naga-inom apisar on-duty ang navideohan nga traffic enforcer.
Pahanumdom ni Lacson nga importante nga mangin zero corruption sa traffic management kag wala gid ginatolerar ang padrino system bangod ang mga ini kun kis-a ang nagapadayaw.
Ginpasalamatan man sini ang mga nagapost sa social media sang mga makita nga bayolasyon.
