Ginbaklas na ang bahin sang balay ukon payment center kun sa diin nahamtang ang poste sang traffic light sa Sto Niño Stop, Brgy 2, Bacolod City.
Sa interview sang Bombo Radyo Bacolod kay Jeff, Panday sa Barangay 2, siya ang ginmanduan ni Punong Barangay Imelda Banguanga sa pagpamalos sang mga butang nga nagatabon sa traffic light.
Madumduman nga madasig nga naglapta sa social media ang isyu matapos gincater sang Bombo Radyo Bacolod, bangod ang traffic light ang kaangay sa uhong nga nagalusot sa atup sang nasambitan nga establishimento.
Una naman nga gin-athag ni Banguanga nga ang demolition sang mga road obstruction ang trabaho sang Barangay, apang wala matandog bangod sa election period.
Napilitan naman nga itukod sang City Engineer’s Office ang traffic light bisan yara pa ang balay bangod kinahanglan nga dungan nga mapaandar ang mga bag-o nga traffic lights.
Agud masulosyonan, gilayon man nagmando ang Punong Barangay kay Jeff, sa pagpahanugot man sang tag-iya sang propedad, nga pamaluson bisan ang mga obstruction lamang anay sa traffic lights.
Sa paglabay sang Bombo News Team sa area, makita na nga kaangay nga gin-angkaban ang bahin sang balay, bangod napalos na ang mga karatola, signage sang payment center kag atup nga nagatabon diri.
Samtang ang sa palibot ang intact gihapon, kag mahimo nga idemolish na lamang kun maabtan na sang road widening project sang Department of Public Works and Highways.
