Luyag sang konsehal sa ciudad sang Bacolod nga mahatagan sang resolusyon ang ginareklamo nga ginapatindog nga cellsite sa Purok Tonggoy, Barangay Mandalagan, Bacolod City.
Sa interview sang Bombo Radyo Bacolod kay Bacolod City Councilor Atty Renecito Novero, Chairperson sang Committee on Human Rights sa Sangguniang Panlungsod sa ciudad sang Bacolod, personal nga ginpalab-ot sang mga residente ang reklamo angot sa lipot nga pagpatindog sang cellsite apisar sa pagpamatok sang pumuluyo.
Suno kay Novero, nakapublic hearing naman ang barangay angot sa nasambit nga reklamo.
Suno diri nagdihon man ini sang resolusyon sa Sangguniang Panlungsod nga nagahingyo nga indi lang anay pagdayunon ang pagpatukod sang cellsite tubtob nga masolusyunan ang reklamo sang mga pumuluyo.
Dugang pa sini nga dapat man kuntani nga pamatian ang mga pumuluyo bangud apektado ang ila nga kabuhi kag ang ikaayong lawas bilang kabahin sang ila tawhanon nga kinamatarong.
Ang resolusyon nga ginhimo sini ang gindefer sa committtee hearing sa Sangguniang Panlungsod.
Suno diri, wala man sang tikang ang konseho bangud ini ang ginrefer lamang sa City Legal Office kag ginahulat nalang ang ila opinyon.
Suno sa konsehal ang punto sini nga kuntani ang konseho ang magpagwa sang resolusyon para sa tikang nga pagahimuon tuhoy sa reklamo sang mga pumuluyo angot sa ginapatindog nga cellsite.
Suno diri dapat man kuntani pamatian ang sentimyento sang mga pumuluyo kag ini ang respetuhon.
