Gin-aprubahan na kahapon sa session sang Sangguniang Panlungsod sang Negros Occidental ang pagdeklarar sang state of calamity sa bilog nga probinsya bangod sa red-striped soft scale insect (RSSI) nga nagapanghalit sa mga katubuhan.
Ini kasunod sa rekomendasyon sang Negros Occidental Provincial Disaster Risk Reduction and Management Office.
Pinaagi sini sarang na nga ma-tap sang tagsa ka mga banwa kag ciudad nga apektado ang 30 percent Quick Response Fund para sa pag-address sa problema.
Kalakip diri ang suporta sa mga apektado nga sugar planters, kag mga tikang agud matapna ang mga peste kaangay sang pagpanghatag sang pesticides, kag pagpadamo sang fungus nga makabato sa RSSI.
Sa ulihi nga datos sang Sugar Regulatory Administration (SRA) sang Hunyo 26, ang total area sang sugar plantation nga nareport nga apektado sa Negros Island Region ang nagdangat na sa 239,215.62 hectares ukon 32.03 percent sang total sugar plantation.
Ini ginalakipan sang 190,314.19 hectares sa Negros Occidental nga 32.18 percent sang total sugar plantation, kag 48,901.43 hectares sa Negros Oriental nga 31.42 percent sang ila total sugar plantation.
Nagdangat naman sa 423 ka barangay ang apektado sa rehiyon, nga ginalakipan sang 365 barangays sa Negros Occidental kag 58 ka barangay sa Negros Oriental.
6,025 ka sugar planters naman ang navalidate nga apektado sa NIR, nga ginabug-usan sang 5,435 sa Negros Occidental kag 590 sa Negros Oriental.
Ang Negros Oriental ang nagaplano naman nga magdeklarar sang state of calamity bangod man sa RSSI.
