Temporaryo anay nga ginapatabunan ang mga gintambak nga basura malapit sa Sum-ag bridge samtang wala pa mahimuan sang paagi sa pagkuha.
Sa interview kay Bacolod City Legal Office Atty Karol Joseph Chiu, sa ginpatigayon nga technical conference sang Lunes, nagtambong ang tag-iya sang propedad nga si Dante Fernandez.
Na-apresyar man nila ang commitment sini nga kuhaon ang mga basura.
Gin-eksplikar sang tag-iya nga sa ila kontrata sang contractor para sa backfilling, duta ang itampok sa propedad gani ginkakibot man sini nga basura ang gin-ula.
Nag-atubang naman sa City Legal Office ang trucker kahapon, kun sa diin nag-ako nga ang basura ang ginkuha nila sa old-dumpsite sa Barangay Mandalagan.
Liwat nga nagpatigayon sang technical conference subong nga adlaw agud mahitso ang mga proseso
Suno kay Chiu, takluban anay ang area sa rekomendasyon sang Department of Environment and Natural Resources bangod sa kahangawa nga magsaka ang tubig sa suba kag anuron ang mga basura, ukon mahimo man nga ini ang paliron sang hangin.
Paathag sini nga kinahanglan pa nga magsumiter sang affidavit of undertaking sang tag-iya antes ilift ang cease and desist order, agud matandog kag mahakot ang mga basura.
Ginatun-an pa sang City Legal Office kun magapasaka sag kaso ukon multa bangod may-ara sang nahimo nga pagbayolar sang ordinansa.
