Gintawag sang labor advocate nga ‘loosing proposition’ ang pagbaligya sang P20 kada kilo nga bugas.
Nahibaluan nga sa pagbaligya sang P20 kada kilo nga bugas, ini ang ginasubsidize sang National kag Provincial Government.
Sa interview sang Bombo Radyo Bacolod kay Wennie Sancho, secretary general sang General Alliance of Workers Association (GAWA), dapat lantawon ang millgate price, nga indi man mamierdihan ang mga local farmers.
Sa plano nga pagbaligya sang P20 kada kilo nga bugas, ang gobyerno ang manabunan, kalakip na ang provincial government nga may magamay lamang nga pondo.
Panugyan ni Sancho nga maayo nga dulaon na lamang ang pila sa mga financial assistance ukon ayuda.
Pahayag sini nga sarang makuha sa nasambitan nga pondo ang pangtabon sa P20 kada kilo nga bugas bilang short term solution.
Apang pahanumdom ni Sancho nga dapat tutukan sang gobyerno ang ugat sang problema.
Panugyan sini nga sa pagdula sang iban nga ayuda, mas maayo nga suportahan ang mga local farmers agud mapasaka ang ila produksyon.
Ini bangod ang bugas ang nagapanguna nga ginakaon sang Pilipino kag indi dapat isalig sa importasyon.
Gani dapat nga amyendahan na ang Rice Tarrification Act nga nagadul sang quantitative restriction sa imported nga bugas.
Dugang pa ni Sancho nga ang importasyon ang ginamanipular sang mga dalagkuan nga negosyante.
Kun magsaka ang rice production, magabarato man ang bili sang bugas kag indi na kinahanglan nga isubsidize sang gobyerno.
Dapat nga derekta naman ang pagbakal sang National Food Authority sa mga local farmers kag indi na pagpalabayon pa sa middleman.
Suno kay Sancho, magluwas sa presyo sang humay, may gastuhan pa sa pagpagaling, byahe kag mataas pa ang patong sang middleman gani tuman ka dako ang deperensya sang presyo pag-abot sa merkado.
Suno diri, nangin “Ayuda Country” na ang Pilipinas, kag apisar sa ayuda, indi gihapon makabakal sang bugas ang iban nga Pilipino.
