Malipayon ang Hofileña Family sa ciudad sang Silay nga nabalik na display ang 1936 ‘Mango Harvester’ painting sang National Artist nga si Fernando Amorsolo.
Madumduman ng ginkawat sa Hofileña museum ang nasambitan nga painting sang Hulyo 3, 2024 sang duha ka persona nga nagpakuno-kuno nga nagatour lamang.
Tubtob nga may nagbaligya diri online sa balor nga P3 million, apang nakita sang magabakal kuntani sa painting ang report nga ini ang ginkawat gani nagkoordinar ini sa otoridad.
Natigayon nga mabawi ang painting sa entrapment operation sang National Bureau of Investigation sa Manila.
Sa interview sang Bombo Radyo Bacolod kay Rene Hofileña, caretaker sang Hofileña museum, nakaligad nga bulan pa sang nabalik ang painting.
Apang ginpaiway anay ang unveiling bangod magatambong kuntani ang mga NBI officials, apang wala na matabo bangod nagpatigayon na sang reshuffling sa pwesto, gani gindayun na lamang nila ini kahapon.
Suno kay Rene, hoby sang utod niya nga si Ramon Hofileña ang pagkolekta sang painting.
Kag bangod sila ang mag-abyan ni Fernando Amorsolo, nabakal sini sang barato ang painting.
Suno kay Rene, madamo sadto sang manggaranon nga pamilya sa Negros Occidental, rasun nga nagpadulong diri ang National Artist, kag nagapati si Rene nga madamo pa sang pamilya nga nagahupot man sang painting gikan kay Fernando Amorsolo.
Luyag man sini nga mangin heritage destination ang Silay City, gani ginmando sini nga himuon nga old heritage house ang balay sang ila ginikanan.
Samtang ang hinablos sini nga amo ang magapanubli sang Hofileña museum amo ang nagdisider nga idumili ang pagkuha sang litrato sa mga paintings.
Sa karun, nagapati si Rene nga magadamo pa ang ila visitors ilabi na nga nabalik na sa display ang 1936 ‘Mango Harvester’ painting kag madamo na sang nakahibalo.
Naghire naman sila sang dugang nga gwardya kag magabantay sa ikaduha nga panalgan sang old heritage house.
