Alas-3:00 kaina sang kaagahon, namonitor ang isa naman ka Low Pressure Area sa 440km sa nasidlangan sang Hinatuan, Surigao del Sur.
Manubo naman ang tyansa nga ini ang mangin Bagyo sa masunod nga 24 oras.
Apang subong nga Biyernes, lauman na nga ini ang magatuga sang mga pag-ulan sa Central kag Eastern Visayas, nasidlangan nga bahin sang Mindanao kag pila ka bahin sang Bicol Region.
Maghalong sa posibilidad sang mga pagbaha kag landslide.
Ang LPA ang yara sa sulod sang Intertropical Convergence Zone nga padayun nga nagaapekto sa Mindanao.
Ang ITCZ ang magatuga naman sang lapta-lapta nga mga pag-ulan nga kun kis-a may kaupod nga pagpangilat kag pagpanaguob ukon thunderstorms sa nabilin nga bahin sang Visayas kag Mindanao.
Sa latest forecast, ang LPA ang ginalantaw nga magapalapit pa sa kadutaan kag sa masunod nga inadlaw mahimo nga magtabok sa Visayas Area padulong sa Palawan.
Apisar nga manubo ang tyansa nga ini ang mangin bagyo, lauman nga ang LPA kag ITCZ ang padayun nga magatuga sang pag-ulan sa dako nga bahin sang Visayas kag Mindanao, pila ka bahin sang Bicol Region tubtob na sa pila ka bahin sang Southern Luzon sa masunod nga duha tubtob tatlo ka adlaw.
Samtang ang Easterlies ukon ang mainit nga hangin gikan sa Dagat Pacifico ang nagaapekto gihapon sa nabilin nga bahin sang pungsod.
Ini ang magadala sang mainit kag mapaang nga panahon partikular na sa dako nga bahin sang Luzon.
Apang yara gihapon ang posibilidad sang tumalagsahon nga mga pag-ulan sa hapon tubtob sa gab-i.
