Wasak ang unahan nga bahin sang hauler truck samtang nagtakilid naman ang pickup truck matapos magbunggoanay sa Hda Tibay Lopez, Brgy Efegenio, ciudad sang Talisay Lizares, Negros Occidental, kagab-i, alas- 6:15 sang gab-i.
Ang driver sang hauler truck ang ginkilala nga si Galy Antipatia, 50 anyos, Purok Sampaguita, Brgy Paraiso, Sagay City, samtang wala pa nakilal-an ang driver sang pickup truck nga may tatlo ka sakay kag ang isa diri ang ginkilala nga si Paul Simon Puertillano, residente sang San Carlos City.
Sa interview sang Bombo Radyo kay Police Chief Master Sergeant (PCMS) Michael McDowell ang hauler truck nagabyahe padulong sa ciudad sang Bacolod kun sa diin nag-overtake ini sa isa ka wingvan apang nasugata sini ang Ford Raptor.
Bangod sa makusog nga collision, nagbalabag sa dalan ang hauler truck samtang nagtakilid naman ang pickup truck. Suno kay Reynaldo Aguirre, nakabati sila sang makusog nga lupok kag nakita nga mahinay nga nagbalabag sa dalan ang hauler truck apang ulihi na lamang nakita ang pickup truck nga nagtakilid.
Gilayon nga nagresponde ang rescue team kag amat-amat nga ginkuha ang mga biktima kag gindala sa malapit nga ospital.
