Ginaproseso na sang pamilya sang duha ka manunudlo nga nalakip sa mga napatay sa 7.7 magnitude nga linog nga nagluntad sa Myanmar sang Marso 28, ang pagpapauli sa abo sang duha ka biktima.
Mahibaluan nga nalakip ang duha ka Negrense nga mag-asawa nga sanday Edsil Jess kag Alexis Gale Aladid sa mga namissing kag nasapwan nga wala na sang kabuhi.
Sa interview sang Bombo Radyo Bacolod kay Hermosila Aladid, iloy ni Edsil Jess, sang Marso 28, may yara ini sang gintambongan nga activity kag ginhambalan ini sang iya abyan nga may natabo nga linog sa Myanmar.
Nagpadulong ini sa isa ka abyan sang iya bata nga nagatrabaho man sa Myanmar apang nagbakasyon diri sa Pilipinas.
Didto nahibaluan sini nga missing ang iya bata kag ang iya asawa kag wala na naka-contact pa sa ila.
Sang Marso 31, may mga bangkay nga naretrieved kag tanan nga wala sang identity ang ipaidalum sa mass cremation.
Apang, nag-abot ang Philippine consulate sa Myanmar sa Morge kag nag-ayo sa otoridad nga iseparar ang bangkay sang ginaptihan nga amo ang mag-asawa.
Kalabanan sa mga bangkay ang indi na makilal-an pa bangod nga nadeformed na ang ila nawong.
Nangayo pa ini sang bulig sa duha ka biktima nga kun sila gid man ang mag-asawa, buligan nila ini nga makilal-an sila agud makapauli sa Pilipinas.
Ginkuhaan sang samples ang duha ka bangkay nga kun magsala ang Philippine consulate siya ang mahimo makasohan.
Abirl 15 sang ginkuhaan sang DNA sample ang pamilya sang duha ka biktima kag sang Biyernes, Mayo 2, sila ang ginpahibalo nga nagpositibo ang resulta sang DNA test.
Sa karun, ginaproseso na sang pamily nga makuha ang abo sang mag-asawa sa Yangon, Myanmar bangod indi ini marelease kun indi malapit nga pamilya ang maclaim.
