Ginpahayag sang Pinoy sa Vatican nga napuno ang mga accomodation sa Rome, Italy kaangay sang hotels kag AirBnb bangud sa mga tumuluo nga nagtinir didto para masaksihan ang pagpili sang bag-o nga Santo Papa.
Sa interview sang Bombo Radyo Bacolod kay Jeff Vinas Lagos, Bombo International News Correspondent sa Vatican ang mga nagtambong sa lubong ni Pope Francis ang wala na nagpauli sa ila nga mga lugar kag nagrenta nalang sang matiniran agud nga magsaksi sang conclave ukon ang sekreto nga pagboto sang 133 ka mga cardinals agud magpili sa madason nga Santo Papa.
Tuman kadamo nga tumuluo ang nagpadulong sa Vatican agud masaksihan ang conclave.
Normal man ang sitwasyon sa Rome apisar sang ginpatigayon nga conclave bangud nga may yara sang trabaho.
Ginpahayag man sini nga wala man sang dapat kabalak-an bangud hugot man nga ginapatuman ang seguridad sa lugar kag may nakapalibot nga mga mapag-on nga bollards sa lugar.
Ang kapulisan kag mga security forces ang nagalibot man lugar.
Ang mga Filipino Cardinals nga yara kagab-i kag nagpanumpa sa conclave amo sanday Cardinal Luis Antonio Tagle, Cardinal Jose Advincula, kag Cardinal Pablo Virgilio David.
Wala pa sa karun sang napili nga Santo Papa matapos nga itum nga aso ang nagwa sa chimney sang Sistine Chapel.
