May-ara sang 57 ka field teams nga ginpreparar ang Negros Electric and Power Corporation (NEPC) nga magaseguro sang bastante nga power supply kadungan sa May 12 Midterm Elections.
Sa interview sang Bombo Radyo Bacolod kay Engr. Leomel Tambanillo, Assistant Vice President for Planning and Business Operations, nagpatigayon sila sang orientation subong nga adlaw para sa tanan nga imbulbado nga impleyado kag contractors bilang preparasyon sa eleksyon sa Lunes.
37 ang ginpreparar nga crew nga iplastar sa lainlain nga lugar kag may 20 ka roving teams nga magalibot sa 161 ka mga voting centers sa area of coverage sang Negros Power sa Silay City, Talisay City, EB Magalona, Murcia, Bacolod City kag Bago City.
Pinaagi sini, mangin madasig ang response inkaso may wala ginalauman nga problema.
May-ara man sila sang nakapreparar nga tatlo ka standby generators, nga handa nga madispatch ano man nga oras.
May-ara man sila sang 24 hours command center, kag ini ang magakoordinar sa Commission on Elections sa mga dapat ipahibalo may kaangtanan sa power service.
Pasalig ni Tambanillo nga sila ang 100 percent ready na.
Suno diri, wala na sang schedule power interruption bangod gintempranuhan na nila ang pagrehabilitate sang mga electrical equipments kaangat sa service entrance kag transformers kun sa diin konektado ang mga eskwelahan nga gamiton nga polling centers.
Ginapasalig sang Negros Power ang bastante nga supply sang kuryente antes, mismo kag matapos ang adlaw sang eleksyon.
Ini bangod ang isa sa nagakinahanglan gid sang kuryente amo ang canvassing sang boto, transmission sang election data kag ang proklamasyon sang magadaog.
