Immediate termination sang Joint Venture Agreement sa tunga sang Prime Water kag Bacolod City Water District ang panawagan sang BACIWA Employees Union.
Sa interview sang Bombo Radyo Bacolod kay Leny Espina, presidente sang BACIWA Employees Union, nagpadala sila sang sulat sa Malacañang nga nagapanawagan sang immediate termination sang JVA agud mabalik sa gobyerno ang pagdumala sa water distribution sa ciudad sang Bacolod.
Pahanumdom sini nga 2020 sang magsugod sa pagtake-over sang Prime Water kag sa halos lima ka tuig, wala gid nila napaayo ang serbisyo.
Sa baylo, ang Prime Water ang nag-implementar sang 12 percent Value Added Tax, nagpasaka sang balayran, apang pulaw-bugtaw gihapon ang mga pumuluyo agud makasalod.
Nagapati ini nga dako na ang nadula sa gobyerno, apang ang income ang nagakadto lamang sa Villar.
Suno diri, kun BACIWA gihapon ang nagakapot sa water distribution, kinahanglan sang public consultation, magalabay pa sa approval kag may ara sang accountability sa pagpatuman sang mga pagpataas sa balayran.
Apang sa karun, nagakakibot na lamang ang mga pumuluyo sa mga ginadugang sa balayran.
Panindugan ni Espina nga ang pierde ang mga konsumedor kag ang pamilya Villar lamang ang may pagdaog bangod bastante ang water supply sa ila nga mga subdivision kag iban pa nga establishimento.
Suno diri, wala gid nahatagan katumanan ang ginpirmahan sa JVA, nga kuntani sa karun ang Prime Water ang nagasupply na sang 24/7 uninterrupted nga tubig sa kada panimalay.
Dugang pa sini nga sa pagpatakod sang linya sang tubig, ang nakasugtan nga buksan lamang sang pumuluyo ang gripo yara na ang tubig, apang pila ka lugar sa Bacolod ang ginadeliveran na lamang sang tangke sang tubig.
Ang Prime Water ang wala man nagapagwa sang breakdown sa ginkadtuan sa gina-alegar dako nga investment nga gintanyag antes ang pagsulod sa JVA.
