Nagpanahanumdom si outgoing Vice Governor kag 4th District Representative-elect Jeffrey Ferrer sang Negros Occidental nga indi mangin tuman ka emosyonal sa resulta sang eleksyon bangod indi na mabalik kun may-ara sang madula nga kabuhi.
Ang pahayag ni Ferrer ang ginpagwa sini kasunod sang shooting incident nga nagluntad sa sa Sitio Ipil-Ipil, Brgy Mambulac, ciudad sang Silay, Negros Occidental kahapon sang aga.
Ang mga biktima ang mga miyembro sang Team Ugyon nga nagamonitor sa ginapahayag lapnagon nga vote buying kag yara nagabantay sa pribado nga balay nga nagaserbe headquarters sang Team Asenso.
Ang mga napatay ang ginkilala nga sanday Albert Salimbot, yara sa legal nga edad, residente sang Hda. Macamig Pulo, Brgy E. Lopez kag Ronnie Piedad, 45 anyos, residente sang Zone 7, Purok Ipil-Ipil, Brgy Mambulac samtang ang mga pilason naman ang ginkilala nga sanday Ruel Espinosa, 42, anyos, Purok Highway, Zone 15, Talisay City; Ric Ortillano, 46 anyos, residente sang Hofileña Subd, Brgy Mambulac; Wilfredo Cuello, 46 anyos, residente sang PLDT Baybay, Brgy Mambulac; Jason Belleza, legal ang edad, residente ang Yolanda Housing, Brgy E. Lopez; Joey Pomares, residente sang Brgy Mambulac; Glenn Gutierrez, 49 anyos, residente sang Cabay Bodegam Brgy Guinhalaran, kag may isa pa nga wala nakuhaan sang identity.
Suno kay Ferrer, sa paglibot sini matawhay nga napatigayon ang eleksyon sa kalabanan nga mga lugar.
Maayo man ang proseso halin sa pag-assists sang mga manunudlo sa mga botante tubtob sa pagproseso sang balota.
Suno diri, indi maayo sa imahen sang Silay City kag probinsya sang Negros Occidental ang natabo nga shooting incident.
Pahanumdom sini sa kandidato kag supporters nga ini ang eleksyon lamang gani indi dapat pangunahon ang emosyon.
Pahayag sini nga dapat magtrabaho na lamang matapos ang eleksyon, apang kun pairalon ang kaakig kag makapatay, ang kabuhi ang indi na mabalik.
