Padayon man ang pagpanawagan sang alkalde kag sa karun Vice Mayor Elect sang La Castellana, Negros Occidental sa national government sang fund replenishment bangud naubos na ang pondo sang banwa bangud sa epekto sang paglupok sang Bulkan Kanlaon.
Sa interview sang Bombo Radyo Bacolod kay Mayor Rhumyla Nicor-Mangilimutan, nagpadulong ini sa Mercedes sa bahin sang Barangay Sag-Ang bangud ang mga pananum sang mga residente ang naapektuhan naman sang ash fall bangud sa liwat nga paglupok sang Bulkan Kanlaon.
Suno kay Mangilimutan naapektuhan gid ang mga tanum sang mga residente bangud sa asupre nga nagtupa sa mga dahon.
Nagpanghatag naman ini sang facemasks sa mga residente.
Magluwas sa tanum apektado man ang mga water source sang mga residente bangud kalabanan nga ginakuhaan sang tubig ang yara sa tiilan sang bulkan.
Sa karun, padayon ang pagpanawagan sang alkalde sa national government sang dugang nga pondo bangud makatatlo na ka beses nga naglupok ang bulkan ang request sini ang wala pa mahatagan sang katumanan.
