Tatlo na lamang sa mga pasyente sa pagpangluthang sa Sitio Ipil-Ipil, Brgy Mambulac, Silay City ang nagapabilin pa sa ospital.
Sa interview sang Bombo Radyo Bacolod kay reelected Silay City Mayor Joedith Gallego, na-inquest na kahapon ang prime suspect nga si Punong Barangay Arnie Benedicto sang Barangay Lantad, Silay City sa two-counts of murder kag frustrated murder.
Ang mga napatay ang ginkilala nga sanday Albert Salimbot, yara sa legal nga edad, residente sang Hda. Macamig Pulo, Brgy E. Lopez kag Ronnie Piedad, 45 anyos, residente sang Zone 7, Purok Ipil-Ipil, Brgy Mambulac samtang ang mga pilason naman ang ginkilala nga sanday Ruel Espinosa, 42 anyos, sang Purok Highway, Zone 15, Talisay City; Ric Ortillano, 46 anyos, residente sang Hofileña Subd, Brgy Mambulac; Wilfredo Cuello, 46 anyos, residente sang PLDT Baybay, Brgy Mambulac; Jason Belleza, legal ang edad, residente sang Yolanda Housing, Brgy E. Lopez; Joey Pomares, residente sang Brgy Mambulac; Glenn Gutierrez, 49 anyos, residente sang Cabay Bodegam Brgy Guinhalaran, kag may isa pa nga wala nakuhaan sang identity.
Madumduman nga ang miyembro sang Team Ugyon ni Gallego ang nagabantay sa gwa sang ginagamit nga balay sang Team Asenso bangod sa report sang lapnagon nga vote buying.
Apang pag-abot ni Benedicto, siya ang nagsulod sa balay, naggwa upod ang tatlo pa ka persona kag didto na ginluthang ang mga biktima.
Ang nagpasaka sang kaso amo ang pamilya sang duha nga napatay kag ang una nga nakagwa sa ospital sa pito ka nasamaran.
Kahapon nakagwa na ang tatlo ka pasyente gani tatlo na lamang ang nabilin, nga nagpaidalom pa sa operasyon bangod sa patal nga mga samad.
Apisar nga dako ang gasto sa pagpa-osptal, ini ang nangin mamag-an bangod may-ara man sang iban nga nagabulig sa alkalde.
Panawagan ni Gallego sa mga nagdaog gikan sa pihak nga grupo nga magkooperar kag ipakita nga ang purpose sa pagpapili amo ang pagbulig sa mga Silaynon.
Pahanumdom sini nga natapos na ang eleksyon, gani dapat natapos naman ang pamulitika.
Mensahe naman sini sa mga nagagamit sang fake accounts agud mangguba, nga ini ang untatan na antes pa mapasakaan sang kaso.
Aminado si Gallego nga ang fake accounts ang nagabatikos sa parehas nga partido, kag siya ang wala gid malipay sa kaangay nga buluhaton.
