Patay ang 21 anyos nga Lin-ay sang Brgy E. Lopez sa ciudad sang Silay matapos makabunggo ang motorsiklo sa nakapark nga canter truck sa Circumferential road, Brgy Bata, ciudad sang Bacolod, sang Miyerkules, pasado alas-7:00 sang aga.
Ang biktima ang ginkilala nga si Rahsel Tayco, college student sa kurso nga Bachelor of Secondary Education (BSEd) kag residente sang Purok Sunset, Brgy. E. Lopez ciudad sang Silay samtang ang driver sang truck naman ang ginkilala nga si Jocil Roncal, 49-anyos kag residente sang Sitio Bagroy, Brgy. Delicioso banwa sang Ilog.
Sa interview sang Bombo Radyo Bacolod kay Police Lt.Col. Ramel Sarona, pinuno sang Traffic Enforcement Unit sang Bacolod City Police Office, nagabyahe sakay sa motorsiklo si Tayco padulong kun tani sa eskwelahan sini.
Apang, pag-abot sa area kun diin nagluntad ang aksidente, nadulaan ini sang kontrol sang iya motorsiklo kag deretso nga nakabunggo sa nakapark nga truck.
May suksok man ini nga helmet apang ini ang nawasak bangod sa makusog nga impact.
