Ginpasalig sang branch manager sang National Food Authority – Negros Occidental nga newly milled rice ang ibaligya sa balor nga P20.
Sa interview sang Bombo Radyo Bacolod kay Benilda Fidel, ginahulat pa nila kun sin-o nga mga local government units ang mahatagan na sang go signal sang Food Terminal Incorporated (FTI).
Paathag sini nga ang releasing lamang ang role sang NFA bangod ang FTI amo ang nagacoordinate sa mga LGUs.
Ang Bacolod City ang ginapahanugutan nga makabakal sang 8,000 ka sako sang bugas sa NFA apang sa karun 5,880 bags pa lamang ang baklon sang ciudad sa balor nga P7.7 million kag magabakal nalang sang dugang kun makita nga manamian ang mga Bacolodnon.
Ginalantaw sini nga may-ara pa sang ginahitso nga mga dokumento ilabi na nga naglain na ang alkalde sang pila ka mga LGUs kalakip sa Bacolod matapos ang 2025 Midterm Elections.
Apang pasalig sini nga ano man nga oras, nakahanda nga magrelease ang NFA kun may go signal na gikan sa FTI.
Pasalig ni Fidel nga indi bahay kundi newly-milled rice ang ila nga ihatag.
Ang newly-milled rice ang nagatumod sa zero to three months pa lamang sang ginpagaling, kag pasalig sini nga sila ang indi magarelease sang bugas nga lapaw na sa tatlo ka bulan.
Paathag man sini nga gikan sa local farmers ang ila mga bugas kag ang NFA ang wala na nagabakal sang imported nga bugas.
Nakadepende naman sa LGU kun ano ang arrangement sang ila pagbaligya sang P20 nga bugas sa publiko.
