Magadihon ang mga local Government Unit nga apektado sang paglupok sang Bulkan Kanlaon sang permanente nga relocation site para sa mga residente nga nagapuyo sa 6km extended danger zone sang Bulkan Kanlaon.
Sa interview sang Bombo Radyo Bacolod kay Donato Sermeno III, Regional Director sang Office of Civil Defense-Negros Island Region, wala malakip ang ciudad sang San Carlos sa ila listahan nga pahamtangan sang permanente nga evacuation centers kag relocation site sa una ginpatigayon nga quarter meeting sang Provincial Disaster Risk Reduction and Management Office (PDRRMO) bangud wala ini nagparesir nga may i-irelocate ini nga mga pumuluyo.
Apang sa ikaduha nga paghinun-anon, nagpahayag na ini nga kinahanglanon nila ang permanent resettlement sites para sa mga Internally Displaced Families (IDFs) sang Kanlaon Volcano eruption.
Ang mga Local Government Units nga nagakinahanglan sang permanente nga relocation site amo ang banwa sang La Castellana, ciudad sang La Carlota, Bago kag nadugangan sang San Carlos sa Negros Occidental.
Suno kay Sermeno may natumod na ang ciudad sang Bago nga butangan sang permanent relocation site apang ini ang ginakahangaw-an nga malab-ot sang tsunami gani nagtanum ang LGU sang bakawan agud nga may masagang engkaso nga magsaka ang tubig.
May duha man nga natumod ang banwa sang La Carlota apang liwat nga mangita bangud wala nakapasar sa guidelines.
Natumod naman ang Barangay Cudcud sa ciudad sang San Carlos samtang sa banwa sang La Castellana may yara naman sa Barangay Talaptap kag Barangay Lalagsan.
