Ginapreparar na sang Bacolod City Government ang bulig sa pamilya nga nasunugan sa Barangay 1, Bacolod City paagi sa Department of Social Services and Development (DSSD) kahapon sang kaagahon.
Sa interview kay DSSD Head Dr. Richelle Verdeprado-Mangga ginpahayag sini nga naghatag na ang ciudad sang mga food kag non food items kag ginasiguro sang ila opisina nga may yara sang matiniran ang mga biktima.
Nahibaluan nga sa sunog nga nagluntad sa Barangay 1, duha ang nagtaliwan kag isa ang nasamaran.
Magluwas sa mga food kag non food items, magahatag man sang P15,000 nga financial assistance, P10,000 nga burial package kag pyschological evaluation ang DSSD-Bacolod.
Samtang ginpahayag naman sang Punong Barangay sang Barangay 1, Bacolod City nga magahatag man sila sang financial assistance sa mga nasunugan.
Suno kay Punong Barangay Cesar Rellos Jr., sa natapos nila nga session sa barangay ila nadesisyunan nga magahatag sang bulig sa mga nasunugan kag nalisdan.
Suno kay Rellos, mismo ang iloy sang mga bata ang nagpahayag nga ginbilin sa balay ang gintunaan sang sunog.
Suno diri nagsindi sang kandila ang iloy antes maglakat agud nga magbakal sang ginapangayo nga pamahaw sang mga bata bangud nagbrown-out.
Bisan ang Punong Barangay ang tuman nga kasubo sa natabo sa duha ka mga kabataan.
Suno kay Rellos kun nakahibalo lang ini nga ang bata ara pa to sa sulod sang balay himuon sini ang tanan agud nga masalbar ini.
Nagpanugyan man ini sa mga residente nga maghalong gid kag indi pagpabay-an nga nakasindi ang kandila agud malikawan ang sunog.
