Nangin mabudlay labayan ang dalan sa Barangay Biak na Bato sa banwa sang La Castellana matapos mapuno sang lutak kasunod sng nagluntad nga lahar flow gikan sa Bulkan Kanlaon.
Nahibaluan nga pasado alas-11:00 kagab-i sang magbubo ang mabaskog nga ulan nga nagdugay sang masobra isa ka oras.
Sa interview sang Bombo Radyo Bacolod kay Punong Barangay Joselito Martinez, sila ang naga-aligmat na sa tion nga mag-ulan bangod naka-eksperyensya naman sila sang lahar flow sang Hulyo tinalikdan nga tuig.
Gilayon sini nga ginmando sa mga Barangay Tanod nga magpanilag, gani sa pagluntad sang lahar flow kapin ala-1:00 sang kaagahon gilayon man ini nga nakig-angot sa La Castellana Municipal Disaster Risk Reduction and Management Office.
Nagtawag man ini sa Office of the Civil Defence, sa Philippine Red Cross kag Department of Public Works and Highways nga may ara sang mga heavy equipments nga magamit para sa road clearing.
Ginabanta 50 ka metros ang kalaparon sang apektado nga dalan, matapos mag-awas ang lahar nga may kaupod nga mga bato kag sanga sang kahoy sa dalanon.
Suno kay Martinez, bangod sa mabaskog nga ulan, gin-anod ang mga natipon nga abo sa ibabaw nga bahin sang bulkan kag nag-ilig paidalom, kun sa diin ang Tamburong river ang nagapanguna nga alagyan.
Tubtob sa batiis naman ang kadamulon sang lutak, gani malabayan pa ang dalan, apang may pipila ka mga salakyan nga naguot kaangay sang canter truck nga padulong kuntani sa Canlaon City agud mangumpra sang utanon.
Ang canter truck ang naguot halin ala-1:00 sang kaagahon, kag narescue pasado alas-8:00 na sang aga.
Suno kay Martinez, wala sang mga residente nga napilasan sa lahar flow ilabi na nga na-evacuate na ang masobra 70 ka mga residente sa Barangay sa evacuation center sang nakaligad nga Disyembre.
