Nagdangat sa kapin sa 30 ka truckload sang lahar ang nahakot halin sa brgy Biak na Bato, La Castellana, Negros Occidental.
Sa interview sang Bombo Radyo kay John De Asis, pinuno sang Municipal Disaster Reduction Management Office sang La Castellana, bangod sa pag-ulan nga nagluntad sang Biyernes sang gab-i nag-ilig ang lahar kag nag-awas sa dalan halin sa Bulkan Kanlaon.
Suno diri, may isa ka totally damaged nga balay kag anum ka partially damaged kasunod sa nagluntad nga lahar flow.
Wala naman sang pumuluyo nga nagatinir sa mga balay bangod yara sila nagatinir sa evacuation center.
Gintinguhaan naman nga hawanan ang dalan gamit ang mga backhoe sa pagkandos sa lahar kag ginkarga sa dump truck kag gin-ula sa mga lugar nga may bato-batohon nga dalan.
Samtang ang bilin naman nga lahar sa dalan ang ginpiswitan na lang sang tubig ang dalan agud mapa-ilig ini sa sapa.
Natigayon naman nga maagyan ang dalan kapin alas- 4:00 sang hapon kahapon.
