Ginakabig sang isa ka mountaineer ang pagsaka ang bukid bilang sport.
Sa interview sang Bombo Radyo kay Archie Tragico, miyembro sang peace and environment networks, dapat may yara gid sang plano kag preparasyon antes magsaka sa bukid bangod indi kontrolado sang tawo ang tiyempo kag sirkumstansya nga matabo.
Suno diri, humalin sang 1997 nag-umpisa na ini sa pagsaka sa mga bukid kun sa diin nagsulod ini sa environmental organization sa ila buluthuan apang sadto masami lamang sila magpatigayon sang tree planting.
Humalin sadto nanamian na ini magsaka sa mga bukid.
Naeksperyensyhan man ini ma-injury sa tuhod kun sa diin pila ka bulan man ini wala nakalakat sang maayo.
Pahayag ni Tragico, kun may yara man ini sang luyag balik-balikan, gusto sini nga liwaton nga sakaon ang bulkan Kanlaon.
Ang utod sini nga si Jamrain Tragico ang isa sa napatay sadto sa paglupok sang bulkan sang 1996.
Madumduman nga sang Agosto 10, 1996 may 24 ka mountain climbers nga nagsaka sa bulkan sang naglupok ini kun sa diin napatay ang isa ka British student Julian Green kag duha ka Pilipino nga si Neil Perez kag si Jamrain Tragico bangod yara sila malapit sa crater.
Samtang, mensahe naman sini nga madamo sang ginahatag ang bukid kag oras na para magbayad man ang tawo sa serbisyo nga ginahatag sang bukid.
