Nagasampaw nga kaso ang pangatubangon sang lalaki nga nasamaran matapos matiruhan sang pulis sang ini ang nagbato sa mga kapulisan.
Madumduman ang insidente ang natabo kahapon sang aga sa Purok Balinday, Barangay 2, Bacolod City.
Ini matapos nakabatun sang report ang Bacolod Police Station 2 natuhoy sa suspect nga ginkilala kay Alyas Chong, nga nagalagaw-lagaw sa gwa bitbit ang armas luthang.
Apang bangod makitid ang dalan pasulod sa lugar sang suspect, ginalantaw nga namutikan sini ang padulong nga kapulisan kag gintiro sang magwa sa corner.
Gilayon man ini nga nagdalagan, apang ginlagas man kag gintiro sang kapulisan kun sa diin siya ang naigo sa kamot.
Matapos mapilasan kag mareyalisar nga siya ang wala sang padaog, si Chong ang gilayon man nga nagsungka.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, gin-operahan pa ang nasamaran nga kamot sang biktima subong nga adlaw.
May-ara naman sang mga kapulisan nga nagaserbe nga security sa suspect samtang yara sa ospital.
Suno kay Tolentino, ang suspect ang mangatubang sang kaso sa paglapas sa Comelec Gun Ban, illegal possession of firearms and explosives kag ang pagbato sini sa kapulisan.
Na-recover sa suspect ang cal. 45 pistol kag nakuha man sa balay sini ang nakatungtong sa bangko nga hand grenade.
Si Chong ang nahibaluan nga kapin duha ka semana pa lamang nga nakagwa sa prisuhan, apang ginatumod pa kun ano ang daan sini nga kaso.
Samtang wala naman sa watchlist sang Barangay Anti Drug Abuse Council (BADAC) ang suspect bangod ini ang mahimo malawig nga nagtinir sa prisuhan.
