Nadakpan sa akto sang mga katapo sang Negros Electric Power Corporation ang senior citizen nga nagakuti sang linya sang kuryente sa poste sa Purok Paraiso, Jesusa Heights Subdivision, Barangay Estefania, Bacolod City, kahapon sang aga.
Ginkilala ang nadakpan kay Rey Anthony Yap, 63 anyos residente sang nasambit nga lugar.
Nagapanawagan naman ang katapo sang Negros Power sa mga konsumidor kasubong man sa publiko nga likawan ang pagtakod sang illegal nga connection sang kuryente.
Sa interview sang Bombo Radyo Bacolod kay Leo Arimas, System Loss Reduction Program (SURP) Manager sang Negros Power, naaktuhan nila si Yap nga ginamanipular ang linya sang kuryente.
Suno kay Arimas, ginpablotter na sang mga ini ang insidente kag pasakaan sang kaso si Yap sang paglapas sa Republic Act No. 7832, also known as the Anti-Electricity and Electric Transmission Lines/Materials Pilferage Act of 1994.
Suno diri, ipresentar sang mga ini ang ebidensya kadungan sang pagpagsaka sang kaso batok sa nadakpan kag nakadepende na sa korte ang pagdesisyon sini.
Dugang pa ni Arimas, ang Negros Power ang indi mag-untat sa pagpatigayon sang mga operasyon gani ginaengganyo nila ang mga konsumidor nga untatan na ang illegal connection agud nga indi madakpan kag makasuhan.
