May separado nga scheduled power interruptions subong nga adlaw, Setyembre 12 bangud sa padayon nga rehabilitation kag maintenance sang sistema sang Negros Electric and Power Corporation (NEPC).
Sa interview sang Bombo Radyo kay Engineer Leomel Tambanillo, Assistant Vice President for Planning and Business Operations sang Negros Power, para sa pila ka lugar sa Burgos Feeder 2, may yara sang tag-isa ka oras nga interruption sa aga kag hapon.
Lakip sa mga apektado ang pila ka portion sang Raul Avenue, Tindalo, Shopping area, Barangays 18, 19, 20, 21, 22, 23, 24 kag 26, kag mga lugar sa Borgos Street halin Lacson tubtob Bacolod Cemetery.
May yara man sang mas malawig nga interruption sa pila ka lugar nga sakop sang Gonzaga Feeder 3, lakip ang mga lugar sa Mabini, Boxing, Silay City, Silay AmLife, Cordova Road, Hall of Justice, LPO, LandBank kag pila ka portion sang Barangays 9, 11 kag 17.
Apektado man ang pila ka bahin sang Borgos Feeder 2 kag ang along 16th kag 17th Streets sa Mountain View Feeder 3.
Suno kay Tambanillo, ginapatigayon ini nga rehabilitation agud mapabakod ang backbone sang electrical system.
Kabahin sini ang pag-upgrade sang yara sa 700 metros nga backbone halin sa daan nga bare-wire setup pakadto sa mas dako nga kapasidad nga sistema.
Ini nga proyekto ang ginpatigayon sa mga lugar sa Boxing Street kag sa Burgos Street, halin Central Block tubtob Barangay 9 Hall.
Ginpahayag ni Tambanillo nga ang amo nga rehabilitation kabahin sang mga ginahimo nga tikang sang Negros Power para sa mas masaligan kag mas mabakod nga serbisyo sang kuryente sa Central Negros.
Ginklaro naman niya nga ang one-hour nga mga interruption nga gin-schedule subong nga adlaw bangud ini sa maintenance kag rehabilitation.
Apang ang rotational brownout ukon manual load dropping nga nagakatabo sa mga nagligad nga adlaw lain nga isyu, kag ini ang resulta sang kakulang sang available nga kuryente sa Visayas Grid.
Panawagan sini sa gobyerno nga dapat magengganyo sang mga investors para sa power plants agud masolusyunan ang problema sa kakulang sang supply sa kuryente.
