Ginpaidalum sa state of calamity ang probinsya sang Siquijor bangod sa brownout nga naga-eksperyensyahan nga nagadugay sa 10 tubtob 12 ka oras kada adlaw humalin pa sang gab-i sang Mayo 12.
Sa interview sang Bombo Radyo Bacolod kay San Juan Vice Mayor- elect Coucilor Atty Jayson Capundag, humalin sang gab-i sang election tubtob sa karun halos adlaw-adlaw na nga may yara sang brownout.
Suno diri, apektado ang mga negosyo, trabaho, kag adlaw-adlaw nga pangabuhi sang mga pumuluyo.
Bangod sini, sang Miyerkules gindeklarar nga ipaidalum sa state of calamity ang probinsya.
Suno pa diri, sa ila banwa kun kaisa may yara sang adlaw nga wala sang mahimo nga trabaho bangod nga wala sang kuryente kag madamo na gid sang mga trabaho nga indi matapos-tapos.
Pahayag ni Capundag, humalin sang nakaligad nga tuig maeksperyensyahan na ang power interruptions sa bilog nga isla sang Siquijor apang sa karun mas naglala na gid.
Madamo na gid sa mga pumuluyo ang nagareklamo nga indi na normal ang nagakatabo sa probinsya kag tuman na gid kabudlay ang ila sitwasyon.
Sa pihak sini may yara sang ginapagwa nga advisory ang Province of Siquijor Electric Cooperative (PROSIELCO) apang wala man nagakatuman bangod malawig sa gihapon ang brownout.
Ginalantaw man sini nga ang rason sa pagkadula sang kuryente amo nga nagasaka nga demand sa kuryente apang ang mga equipment sang PROSIELCO ang madaan na gid.
Sa karun, may yara na sang ginapa-abot nga mga equipment agud mahatagan sang solusyon ang problema sa kuryente sang probinsya.
