Ginpahanumdom sang kapulisan sa publiko nga may mga hotline numbers nga mahimo makacontact kun may-ara sang i-report.
Nagapanguna diri ang 911 nga amo ang national number for emergency calls.
Sa pahayag ni Bacolod City Police Office Director Police Col. Joeresty Coronica, sa pagdial sang 911 ini ang magaderekta sa Kampo Krame kun sa diin may-ara sang na-assign nga operator nga amo naman ang magacontact sa concerned police units.
Apang magluwas sa 911 may mga hotline numbers man ang tagsa ka Police Stations.
Ginmando na ni Coronica sa tanan nga station commanders nga seguraduhon nga operational ang mga hotline numbers nga nakapaskil sa tagsa ka mga facebook page sang mga estasyon.
Ang mandato ni Philippine National Police (PNP) Chief Police General Nicolas Torre III, ang may kaangtanan sa nauna sini nga instruction sa pagpatuman sang 3-minutes response time.
Matapos mabatun ang instructions, gilayon man nga nagpatawag sang emergency meeting si Police Regional Office Negros Island Region Director Police Brig Gen. Arnold Thomas Ibay.
Plano sang BCPO nga magpatigayon sang dry run, agud matun-an kun paano ma-implementar ang mando kag ang mga mahimo makaapekto diri kaangay sang traffic.
I-realign man sang BCPO ang pila sa mga PNP resource sa strategic areas nga mahapos ma-access.
Pahanumdom ni Coronica sa mga may luyag nga ireport nga indi na kinahanglan gid nga magpadulong sa Police Stations, sa baylo sarang na nga makacontact paagi sa mga hotline numbers agud mas madasig nga marespondiran.
