Nagapanawagan ang Local Government Unit sang Bacolod City sa publiko nga mangin mahinalungon kasunod sang mas nagataas nga kaso sang Human immunodeficiency virus (HIV) case sa mga pamatan-on sa Pilipinas.
Sa interview sang Bombo Radyo Bacolod kay Councilor Claudio Jesus Puentevella, chairman sang Committee on Health and Sanitation sa Sangguniang Panlungsod, nga humalin pa man sang 2023 tubtob 2024 nagpasar na ini sang resolusyon nga maghatag sang awareness sa mga pumuluyo nga may kaangtanan sa HIV kag nagapartner man ang mga ini sa Non-Governmental Organization (NGOs) sa mga aktibidad nga may tinutuyo nga magpalapnag sang awareness angot sa nasambit nga balatian.
Suno kay Puentevella ang Bacolod City Government ang nagaisa gid sa Department of Health sa pagpanawagan sa publiko nga maghalong agud nga malikawan ang pagdamo sang kaso sang HIV sa ciudad bangud suno sa pahayag sang nasambit nga ahensya nga mas kahaladlukan ang HIV kun ipaanggid sa monkeypox.
Sa Bacolod City may yara sang 16 ka bag o nga kaso sang HIV kag ini ang data as of January tubtob February 2025 kag kalabanan nga kaso ang mga lalaki kag nagaedad sang 25 tubtob 34 anyos.
Nahibaluan nga ang DOH ang nagpanawagan sang national health emergency matapos nga nagsaka ang kaso sang HIV sa Pilipinas sang 500 percent.
