Ginpahayag sang developer sang Country Homes Subdivision sa Barangay Estefania, nga ang nagluntad nga pagbaha matapos ang ulan kahapon ang resulta na sang pagpahanugot sa development sang Rockwell.
Sa pahayag ni outgoing Bacolod City Councilor Vladimir Gonzales, gindangop na sini nakaligad nga tuig kay Bacolod City Engineers Office Head Engr. Loben Ceballos.
Panindugan sini nga dapat wala basta-basta nag-aprubar sang development permit ang City Engineers Office kag Bacolod Housing Authority nga wala ginakonsiderar ang mga yara sa palibot.
Suno kay Gonzales, ang masami nga pagbaha sa ila subdivision ang resulta na sang sala nga drainage plan sang Rockwell.
Panindugan sang konsehal nga 20 ka tuig na nga na-aprubahan ang development permit sang Country Homes, kag bag-o lamang ang sa Rockwell.
Panawagan sini nga amyendahan ang development permit sang rockwell kag maghimo sang adjustments sa drainage plan.
Nahinun-anon naman ni Gonzales ang mga homeowners nga apektado sang pagbaha kag ginpanugyan sa mga ini nga magsulat derekta sa City Engineers Office kag Bacolod Housing Authority.
