Nagapadayon ang pagbayluhanay sang strikes sang Israel kag Iran sa ikalima ka adlaw, kun sa diin ang mga sibilyan ang tuman nga apektado.
Suno sa defense minister sang Israel, nagaplano ang pungsod sa pagstrike sa mga importante nga targets sa Tehran.
Suno sa military sang Iran, gin-igo sini ang isa ka Israeli military intelligence center sa Tel Aviv paagi sa isa ka guided missile.
Nagpanawagan naman ang chief of staff sang Armed Forces sang Iran sa mga residente sang Haifa kag Tel Aviv sa Israel nga mag-evacuate sang timprano pa sa gintawag sini nga isa ka “punitive operation” nga matabo.
Suno diri, ang martyrdom sang mga commanders, compatriots kag scientists ang mangin rason kun ngaa ang mga armed forces ang mangin mas determinado nga magpatigayon sang punitive order.
Ginpahayag sang isa ka Overseas Filipino Worker sa Israel nga mas mabaskog sa karun ang mga missiles nga ginarelease sang Iran.
Sa interview sang Bombo Radyo Bacolod kay Bombo International News Correspondent Tonette Tomas direkta sa Israel, safe man ang mga ini apang kun maghuni ang siren gilayon ang mga ini nagasulod sa bomb shelter agud nga indi maigo sang missiles nga ginpadala sang Iran sa tion nga makalusot sa iron dome.
Suno kay Tomas, ang pag-atake sang Israel ang agud nga proteksyunan ang mga pumuluyo sini.
Ginpahayag sini nga indi matuod ang nagalapta nga video nga madamo sang nasamaran kalakip na ang mga kabataan sa Israel.
Nagpanindugan man ini nga mas safe sila sa tion nga magtinir sa Israel kun ipaanggid nga magbiya sila sa nasambit nga pungsod.
Ang mga nasamaran nga mga Filipino ang nakaday off kag nakatinir sa apartment nga wala sang bomb shelter.
Humalin pa man sang Biyernes ang pag-atake sang Iran sa Israel tubtob sa karun.
Masami man ini nga nagahatag sang update sa iya sitwasyon sa iya pamilya agud masiguro nga siya ang safe.
