Indi ipatuman sang Bacolod Alliance of Commuters, Operators and Drivers (BACOD) bisan ipatuman na sang Land Transportation Franchising and Regulatory Board (LTFRB) ang piso nga saka sa pletehan.
Sa interview sang Bombo Radyo Bacolod kay BACOD President Rudy Catedral, gobyerno ang dapat nga magpangita sang solusyon sa problema sa nagasaka nga presyo sang gatong kag indi ipapas-an sa commuters.
Gintawag sini nga collateral damage ang mga commuters, gani bisan nga sila ang nagapangatubang sa krisis, indi nila luyag nga sa pasahero ipapas-an ang problema.
Dugang pa ni Malacad nga bisan sila nga mga driver kag operators ang may pamilya man nga adlaw-adlaw nga nagabyahe.
Ang BACOD ang may 526 units sa Bacolod City kag may 244 units out of town.
Magluwas sa BACOD, nagapati ini nga indi man magapasaka sang pletehan ang Kabakod Negros Transport Coalition Incorporated (KNETCO) kag United Negros Drivers and Operators Center (UNDOC).
Suno diri, P11 tubtob P13 ang regular sa karun nga plete sang jeep, apang bisan ang mga driver ang nakahangop sa kabudlayan sang commuters gani may iban nga nagasukot bisan P10 na lamang.
Kun luyag nga magsakay sa mas barato ang plete nga jeep, panugyan ni Catedral nga pilion ang wala sang sticker nga tsek sa windshield.
Ini bangod ang may mga sticker nga tsek ang magapasaka sang plete.
Dugang pa sini nga indi balanse kun nagasaka ang presyo sang gatong kag pletehan, apang wala man sang pagsaka sa sweldo sang mga mamumugon.
Panawagan sini sa gobyerno nga imbes pasakaan ang plete sang piso, mas maayo nga paluson ang excise tax kag value-added tax sa produktong petrolyo.
Nagalaom man ini nga matutukan ni President Ferdinand “Bongbong” Marcos Jr. ang fuel industry kag sila ang maregulate.
