Ginsuguran na sang Iran ang pagtimalos sa ginpatigayon nga airstrike sang Amerika sa ila nuclear facility paagi sa pagpalupad sang mga missile sa base militar sang United States sa Qatar.
Ginpaulanan sang Iran sang short-range kag medium range ballistic missiles sang Al Udeid Air Base sa Qatar.
Antes ang pag-atake, gin-abisuhan sang Iran ang gobyerno sang Qatar ang ila pagaatakehon ang military base sang US.
Tinutuyo sang nasambit nga abiso ang malikawan ang dako nga halit.
Ginkondenar sang Qatar ang ginhimo nga pagpang-atake sang Iran kag gintawag ini nga paglapas sa ila soberenya kag airspace.
Ginkondenar naman sang Saudi Arabia ang natabo kag nag-offer sang bilog nga suporta kag bulig sa Qatar.
Suno sa pahayag sang Foreign Ministry sang Saudi Arabia, handa ini nga maggamit sang tanan nga ikasarang sini agud suportahan ang Qatar sa anuman nga tikang nga luyag sini nga himuon bilang sabat sa pag-atake.
Kasunod sini, ginsiraduhan ang airspace sang United Arab Emirates kag Kuwait nga nagapatimaan nga suspendido ang mga flights.
Samtang sa Bahrain, ginpasound ang mga sirens kag aktibo naman ang ila air defense system.
Gin-abisuhan man ang mga residente nga magpadulong sa luwas nga mga lugar.
Suno kay Bombo International News Correspondent Eulalia Subere direkta sa Qatar, pasado alas 7:00 nagluntad ang missile attack kun sa diin daw kaangay nga may naglinog bangud sa kakusog ang pagsigabong.
Nahibaluan nga ng ila nga ginapuyuan ng 30 minutos lamang ang kalayuon sa Al Udeid Air Base.
Wala naman sang may nareport nga napilasan ukon nasamaran sa nagluntad nga insidente.
Sa karun malinong na ang sitwasyon sa Qatar apang kanselado ang ila klase kag opisina subong nga adlaw.
Nagpasalig naman ang ila gobyerno nga manageable ang sitwasyon kag wala sang dapat nga kahangaw-an apang dapat magpadayon lamang sa pagbantay.
Suno kay Bombo International News Correspondent Rose Ann Beriña direkta sa UAE, sila ang ginapapreparar sa karun sang gobyerno sa kun anuman ang posible nga mangin masunod nga tikang sang Iran.
Sa karun, wala man sang may nagalinupad nga missiles sa ila airspace apang kaingod lamang nila ang Qatar.
Suno diri, normal sa gihapon ang sitwasyon sa UAE magluwas sa ginsiraduhan ang ila airspace kag ginkanselar ang mga byahe.
Suno sa OFW, sila ang nagahulat pa sang dugang nga abiso nagikan sa gobyerno sang UAE kasubong man sa embahada sang Pilipinas.
Ang mga ginsarado nga airspace ang amat-amat man nga ginbuksan kapin alas-4:00 kaina sang kaagahon.
