Napurnada ang plano na kuntani nga pagdugang sang sea trip sang fastcraft vessels bangod sa hinali nga tuman ka taas nga pagsaka sa presyo sang produktong petrolyo bangod sa gyera sa tunga sang Iran kag Israel.
Sa interview sang Bombo Radyo Bacolod kay Frank Carbon, operator sang Weesam Express, nagapreparar na sila kuntani sa pagdugang sang byahe, apang karun nga P5 gid ang ginsaka sa presyo sang kada litro sang diesel, indi nila anay ini ipatuman.
Sa baylo, ginakahangawa ni Carbon ang posibilidad sang pagbuhin pa sang byahe.
Apang indi kaangay sa mga land transportation kun sa diin magakinahanglan pa nga magrequest kag maghulat sang approval gikan sa Land Transportation Franchising and Regulatory Board (LTFRB) agud makapasaka sang pletehan, sila sa shipping industry ang sarang na gilayon makapasaka kadungan sa pagsaka sang presyo sang gatong.
Ini bangod nga may ara na sila sang agreement sa Department of Energy (DOE) kag Maritime Industry Authority (MARINA) nga sa kada piso nga saka sa gatong, sila ang may corresponding man nga saka sa pletehan.
Apang sa karun nga tanan ang apektado kag nagataas man ang presyo sang tanan nga produkto, partikular na ang pagkaon,kuryente kag tubig ginakahangaw-an ni Carbon nga maga-iban ang mga pumuluyo nga magabyahe tabok sa Iloilo-Bacolod vice versa.
Gani, nahisugtan na nila nga indi anay magpasaka sang presyo, apang kun maninit gid ang pasahero, mahimo nga iconsolidate na lamang nila ang mga byahe ukon buhinan ang magabyahe nga barko.
