Nagdangat na sa 1,295,463 ang mga na-enroll sa mga pampubliko nga buluthuan sa data sang Department of Education – Negros Island Region.
Sa pahayag ni DepEd NIR Regional Information officer in charge Almyr Caezar Dequiña, as of June 23, yara na sa 88.02 percent ang enrollees kun ipaanggid sang School Year 2024-2025.
Nahibaluan nga magatakop ang enrollment period sa Hunyo 30, gani ginalauman nga malapawan pa sang School Year 2025-2026 ang nakaligad nga number of enrollees partikular na kun may-ara sang mga magatransfer in.
Samtang 6,298 naman ang kakulangan sa classroom sa bilog nga NIR.
Suno kay Dequiña, ini santo sa ginpabutyag sang tagsa ka mga buluthuan nga kulang sa ila pasilidad.
Pasalig sini nga ang mga request ang nagalabay sa proseso kag kun kis-a ginahulat pa nga makalab-ot sa certain level ang kadamuon sang request antes ginapatuman.
Samtang wala pa sang bag-o nga classrooms, ang school heads kag mga stakeholders ang nagapangita sang alternatibo kaangay sa pagmaximize sang space, pagconvert sang iban nga space kag shifting sang schedules sang klase.
Yara naman sa 377 ang kakulangan sa manunudlo sa bilog nga NIR.
Aminado si Dequiña nga kada tuig nagasaka ang demand, bangod nagasaka man ang numero sang enrollees.
Suno diri, ang kakulangan sang manunudlo sa NIR ang manubo kun ipaanggid sa iban nga rehiyon.
Apang sa pihak sini, ginatingahaan sang DepEd-NIR nga mafast track ang pagdugang sang manunudlo.
