‘Fake News’ suno sa National President sang Pinagkaisang Samahan ng mga Tsuper at Operators Nationwide (PISTON) ang pasalig sang gobyerno natuhoy sa fuel subsidy.
Sa interview sang Bombo Radyo Bacolod kay PISTON President Mody Floranda, una na nga ginpaasa ang mga drivers kag operators nga ang gobyerno ang magahatag sang fuel subsidy kasunod sang tuman ka dako nga pagsaka sa presyo sang produktong petrolyo partikular na sa diesel nga nagdangat sa masobra lima ka piso.
Apang kaangay nga wala sang plano ang gobyerno nga ini ang ipatuman sang nagpagwa sang standard nga magahatag lamang sang fuel subsidy kun magdangay na sa $80 per barrel ang presyo sang gatong sa International Market.
Sa karun yara lamang sa $60 per barrel ang oil products nga tuman pa ka layo sa ginset nga standard.
Panidugan ni Floranda nga apisar makabulig ang fuel subsidy, ang ila nga panawagan amo ang dulaon ang excise tax kag value added tax sa produktong petrolyo.
Suno diri dapat nga dulaon na lamang ang oil deregulation law, nga wala man nakabulig sa baylo nakadugang pa sa kabudlayan sang mga pumuluyo.
Nagapati si Floranda nga sa isa ka executive order lamang ni President Ferdinand “Bongbong” Marcos Jr. mahimo na nga masolusyonan ang problema.
Suno diri, indi kaangay sa fuel subsidy nga isa ka sektor lamang ang makabenepisyo, sa pagdula sang VAT kag Excise Tax sa gatong, maganubo man ang presyo kag makabenepisyo sa tanan nga pumuluyo bangod ini ang magaresulta man sa pagnubo sa presyo sang mga nagapanguna nga balaklon.
Pahayag sini nga ginarasun sang gobyerno nga may mga maapektuhan nga problema kun madula ang VAT kag Excise Tax sa gatong bangod ini ang may dako nga kontribusyon, apang panindugan ni Floranda nga madamo pa sang iban nga ginakuhaan sang buwis kag dapat nga mas tutukan sang gobyerno ang paglagas sa mga dalagkuan nga negosyante kag kompanya nga wala nagabayad sang buwis.
SAMTANG…wala sang pulos para sa National President sang Pinagkaisang Samahan ng mga Tsuper at Operators Nationwide (PISTON) ang pagpasaka sang piso sa pletehan kun padayun man ang pagsaka sa presyo sang produktong petrolyo.
Sa interview sang Bombo Radyo Bacolod kay PISTON President Mody Floranda, ginapapas-an lamang sang gobyerno ang problema sa mga commuters.
Apang ini ang indi patas bangod ang mga ordinaryo nga pumuluyo ang wala man sang saka sa sweldo.
Ginapakamaayo man nila nga sa implementasyon sang fare hike kag paghatag sang fuel subsidy, ginlakip bisan ang mga unconsolidated jeepneys.
Ini bangod sa ila pagtuon, 33.9 percent pa lamang ang naaprubahan sa consolidation process.
Suno diri, masobra 60 porsyento sa mga nag-apply ang wala nakacomply sa mga requirements ukon wala na-aprubahan.
Panindugan sini nga sila ang padayun nga nagapreparar kag ginapanilagan ang hulag sang gobyerno, gani sila ang nakahanda man nga magpatuman sang nationwide transport strike kun indi pagid mag-untat ang asod-asod nga saka sa presyo sang produktong petrolyo.
Panawagan sini sa tanan nga drivers, consolidated man ukon unconsolidated nga updan ang ila panawagan nga paluson ang excise tax kag value added tax sa mga produktong petrolyo.
