Nagapasalamat ang asawa sang subject sa drug buybust operation nga ini ang nadakpan na sa Purok Bayanihan, Barangay Villamonte, Bacolod City alas-9:50 kagab-i.
Ang subejct person ang ginkilala nga si Eddieboy Billabestre, 42 anyos, wala sang trabaho kag residente sa nasambitan nga lugar.
Si Billabestre ang ginakabig nga high value individual kag yara sa listahan sang Barangay Anti-Drug Abuse Council (BADAC).
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 4, narecover sa suspect ang 10 ka sachet sang suspected shabu nga ginabanta nagabug-at sang 20 ka gramos nga may standard drug price nga P136,000.
Suno kay Bonilla, nagapasalamat ang live-in partner nga nadakpan ang iya nga bana bangod nagakahangawa naman ini sa illegal nga aktibidad ni Eddieboy.
Pahayag sang asawa nga halos kun magkaon ukon magtulog na lamang nagapauli ang iya nga bana kag ini ang masami nga yara sa eskinita upod ang grupo sini sa illegal nga buluhaton.
Aminado man ini nga nagagamit sang illegal nga droga ang iya live-in partner.
Suno kay Bonilla, gilayon nila nga ifile ang kaso may kaangtanan sa Republic Act 9165 ukon Comprehensive Dangerous Drugs Act of 2002 kun makuha na ang resulta sang test sa mga drug items sa crime laboratory. SAMTANG…Arestado sa ikaduha nga beses ang 40 anyos nga lalaki matapos liwat nga madakpan sa drugbust operation sa Purok Langis, Barangay Banago, Bacolod City alas-7:26 kagab-i.
Ang subject person ang ginkilala nga si Alejandro Pestolante aylas Caz, 40 anyos, wala sang trabaho kag residente sang Purok Kawayan, Barangay Banago, Bacolod City.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, narecover sa suspect ang siyam ka sachet sang suspected shabu kalakip na ang buybust item.
Ang suspected shabu ang ginabanta nagabug-at sang apat ka gramos kag may market value nga P66,666.67.
Sa karun ang suspect ang nakahunong sa Bacolod Police Station 3 kag liwat nga mangatubang sang kaso may kaangtanan sa Republic Act 9165 ukon Comprehensive Dangerous Drugs Act of 2002.
