Napangayo sang kooperasyon ang Office of the Civil Defense – Negros Island Region (OCD-NIR) sa mga evacuees sa banwa sang La Castellana matapos nga nagpuli ang iban nga evacuees sa ila panimalay sa sulod sang 6km extended danger zone.
Sa interview sang Bombo Radyo kay OCD-NIR Director Donato Sermeno III, padayon ang ila pagpakig-angot sa Municipal Disaster Risk Reduction and Management Office sa mga evacuees nga nagbiya sa evacuation center nga wala nagpahibalo.
Suno diri, naintindihan sini ang kabudlayan sang evacuees nga humalin pa sang Disyembre 9 sang ginpasaka ang alert level sa alert level 3 kag nagpabilin ang mga Internally Displaced Persons (IDPs) sa evacuation center tubtob sa karun.
Dugang pa gid nga nagpabudlay sa ila amo ang pagbukas sang klase kag ang ila mga estduyante nagtransfer sa iban nga buluthuan kag nangin mabudlay ang ila pagbyahe dugang pa nga wala na sila sang palangabuhian.
Nagareklamo man sila sang mga tents nga ila ginatiniran nga kun mag-inulan nagakapalid kag kag nagatulo sa sulod.
Pahayag ni Sermeno, importante sa gihapon ang safety sang mga pumuluyo kag nagpasalig nga maghatag sang temporary emergency solutions agud mapa-improve ang sitwasyon sang mga evacuees sa evacuation centers.
Samtang, indi mabasol suno kay Negros Occidental Governor Eugenio Jose “Bong” Lacson ang mga Internally Displaced Persons (IDPs) nga nagpauli sa ila mga panimalay sa sulod sang 6km extended danger zone.
Ini kasunod sang pagpauli sang 33 ka pamilya ukon 80 ka indibidwal gikan sa evacuation center sa covered court sang La Castellana National High School nga wala pahanugot sang Local Government Unit.
Suno sa gobernador indi mabasol ang mga evacuees bangod halos tunga sa tuig na ang ila pagtinir sa evacuation centers.
Aminado ini nga indi conducive nga puy-an sa malawig nga tion ang mga evacuation sites.
Suno diri, ang mga evacuees ang nagpauli sa window hours nga ginapahanugutan ang pagsulod sa 6km Extended Danger Zone para sa pagpanguma ukon pag-asikaso sang mga kasapatan.
Apang panindugan ni Lacson nga kumbinsihon gihapon nila nga magbalik sa evacuation centers ang mga pumuluyo bangod ang probinsya ang nagasalig sa kun ano ang alert level status sang Bulkan Kanlaon.
Sa karun nagapabilin sa Alert Level 3 ang status sang Bulkan, kun sa diin ang 6km radius gikan sa crater sang bulkan ang indi pa mahimo puyuan.
Pasalig naman ni Lacson nga magapadayun ang Provincial government sa paghatag sang bulig.
